Üsi drü Heude – dr Schimpfruedi – ä währschafte Buur usem Bschüttu – dr Pesche – si Töfflimech us Burdlef – wo sech guet mit Technik u Politik uskennt – u dr Tschämmeri – dr Beizer vom Hirsche z Hasle u Bsitzer vore Harley mit internationauem Fler – si auso aui zäme wie geng im Hirsche ar Bar gsi.
Dr Ruedi u dr Pesche uf de Barhocker u hinger dr Plexiglasschibe – wo dr Pesche am Tschämmeri wäg de Uflage vo de Arschlöcher z Bärn unge für zwöi Stange mit Sitewage agmacht het – Es isch dr letscht Tag gsi vor der Ifüerig vor Zertifikatspflicht – das isch üsne Heude natürlech igfahre – Am Tschämmeri bsungers, wüu är ohni Impfig ja när sini Beiz nümm chönnt füere – Aber zum Glück het är gwüsst – dass die Gimpfte äbä aui bis ändi Monet a ihrer Impfig wärde stärbe u das het er am Pesche u am Ruedi verzeut – U dr Pesche het a sini Muetter dänkt – Wo o gimpft isch – Aber ihm äbä glich o ä Muetter isch gsi – U das het nä auso scho gschluchet – Da chaner ke Heu drus machä.
Aber wie ner när a däm Abä uf sim Hof im Bschüttu isch acho – u ungerhaub dr Hof vom Bachmä gseh het – ohni Liecht – aber mit sim nöie Tenn mit auem Schniggschnagg – u ihm i Sinn isch cho – dass dr Bachmä ja gimpft isch – da het er plötzlech e gueti Idee gha – u het sini Stirnlampä agleit – u sis Mässband gnoh – u isch zu däm Bachmä sim Tenn übere.
Das het ir chüele Nachtluft no richtig nach früschem Houz gschmöckt – u isch o süsch ufem nöiste Ständärd gsi – so richtig mit Cod zum igäh am Ihgang – Het ihm dr Bachmä natürlech aues stouz demonstriert gha – dä arrogant Siech – u das gscheht ihm iz Rächt – het der Ruedi dänkt – u het liisli fasch afä kichere – U der Ruedi het dä Cod igäh – 2021 – ds Erbouigsjahr vom Tenn – u när ischer ine.
Dinn hets fasch wie i sim eigete Tenn gschmöckt – aber irgendwie vornähmer – u der Ruedi het sich wieder gfragt – wie ä Ämmitauer Buur so öppis mit sine Subventionä cha zahlä – da isch ömu sicher öppis fuu – u das Tenn würd vo däm här äbä – iz rein us moralischer Sicht – viu besser zum Ruedi passä – aus zum Bachmä.
U zum Bispiu d Regä – wo Spitex isch z Trachsuwaud – u eifach ä Gueti – ä Glatti – ä Gschidi – u guet gseht sie äbä o us – auso die isch ja o nid gimpft – auso diä isch ja när ono da – u witer isch der Ruedi nid cho mit dänkä – wüu är mit sire Stirnlampä äbä scho nid schampar guet gseh het – isch är nämlech plötzlech gstoglet – über was isch das – es Seili – u das Seili het irgendwie wie zuegschnappt – u am Ruedi si Fuess isch gfange gsi – Wiä ihre Fauä eigetlech – U när het er nüt bessers gwüsst – aus eifach lossecklä – u är het gmerkt – dass er eigetlech soumässig bsoffä isch – u das Seili geng no a sim Fuess – U när ischer fadegrad härä gheit – u blibä ligä.
U ire Stadt nid wit wäg – hockt ä Outorin spät ir Nacht a ihrem Chuchitisch – u fragt sech wärum sie iz scho wieder über dä huere Ruedi u sini Kollege schribt – wüu sie het ja scho lang nümm meh mit em Land ztüe – u sie het o gar ke Ahnig – über nöimodischi Tenn – u augemein si dä Ruedi u dä Pesche u dä Tschämmeri – ja nur klischierti Vorsteuigä vo ihrä – zämägsetzt us Erinnerige – u viu lieber würd sie über urbani Themä schribä – oder sogar globau interessanti Themä – u vorauem nümm uf Bärndütsch – u darum hört sie iz uf.