Wieso. Wieso wotsch, dass ich gahn? Verstahn bis hüt nöd, wasi gmacht han. Im Früehlig hesch dich doch no für mich entschiede. Hesch mis Inserat glese und alles perfekt gfunde. Sogar dini Kollege hend mi möge. Und jetzt? Was isch passiert? Was hani gseit und gmacht, was dich so het möge? Mir hend doch perfekt zämepasst. Hesch gseit, bruchsch dringend öppis neus. Öpper jungs mit Visione, mit Lust am Lebe und Schalk im Nacke. Und denn seisch, dir seg das alles zviel. Debi hesch du doch die Polybeziehig welle. Und jetzt wotsch mi nüm und dich lieber uf die andere konzentriere. Die seget vielversprächend und ich wür eui Beziehig gförde. Seg mal, hetsch der das nöd früehner chöne überlegge? Weisch was han ich für dich lah ligge? Ich het es anders Läbe chöne ha – aber du hesch mich doch welle! Monatelang hämmer über eusi Gfühl und Plän gredet. Ich ha gmeint, mir hend die gliche. Aber scho nachme halbe Jahr hesch eh Pause welle. Und nur zwei Wuche spöter hesch mich ganz verlah. Für was? Du seisch, vo Schuld wetsch du nöd rede. Aber ich ha di immer welle unterstütze, nur du hesch mi nöd welle. Scho lang hesch mer s Gfühl ghä dass ich alles falsch mach. Dass ich nöd guet bin, wieni bin. Das lahn ich mer nöd länger gfalle. Du hetsch mis Härz chöne ha. Liebi, villich isch besser, wenni gahn. Du schiensch dis Unglück selber zsi. Denn lieber ohni mich.
