Iz hocke sie no hie – im Hirsche z Hasle – üsi zwöi Heude vom Land – dr Ruedi usem Bschüttu bi Huttu – wo so gärn gäg Bärn schimpft u sich nid impft – u der Pesche – der Töfflimech vo Burdlef – e coole Siech mit Tattoos u Sunnebrülle – u viu Ahnig vo Technik – hocke vor ihrne Stangä bim Tschämmeri ar Bar – dr Tschämmeri isch der Wirt u het ä Harley – vo däm här e Maa mit internationauem Fler wo scho viu isch umecho.
Hinge im Egge hockt dr Fritz – dr aut Chnächt vo Inäbnits – u tuet so aus würd är dr Blick läsä – derbi cha dä gar nid läsä – das wüsse aui z Hasle – aber das het iz o gar nüt dermit ztüe – dass äbä die angere Drü sehr bekümmeret si – wüu iz het dr Bundesrat gseit – Dä Berset das Arschloch – seit der Tschämmeri – das me baud nur no mit somene Zertifikat id Beiz cha.
U ds Teste müess me de säuber zahle – huere tüür – seit der Tschämmeri – u tuet u huere weh – seit der Pesche – die steckä dir ä Draht – so dick wie äs Brämskabu vomne Töffli – dür ds Nasäloch u bis iz Hirni ufä – u dert platziere si när äbä dä Tschip – wo macht dassd di när wosch la impfe.
Es isch der letscht Tag vor dere nöiä Regelig – u es chunnt dene Drü vor – aus wärs o chli der letscht Tag überhoupt.
Was wird när us mir – fragt dr Tschämmeri – weni gar nümm i mini eigeti Beiz cha? – Hä? – Das hei sich die ach so gschide Gringe ds Bärn unge wieder nid überleit – aber i sägä öich iz eis – eifach unger üs – mir müesse nümm lang wartä. – Uf was? – Uf ds nächstä Bier? – rüeft der Pesche – dä isch eifach ä coole Siech – Aber der Tschämmeri blibt ärnst – u wird irgendwie fasch immer ärnster – u fixiert dr Pesche u der Ruedi mit sine dunkubruune Ouge – u chüschelet – Im Oktober wärde di Gimpfte aui stärbe.
Äuä – seit der Ruedi u isch scho schockiert – zum Bispiu sini Mère – die isch nämlech gimpft – u die het ne immerhin uf d Wäut bracht – u när haut au die Sachä gmacht wo Müettere so mache für ihri Ching – u am Ruedi rütscht fasch ä Träne über d Backä – u är fragt nomau – u iz weniger luut u würklech ängstlech – Bisch sicher? – Würklech aui?
Aber der Tschämmeri räusperet sich nur – u verdräit d Ouge – u laat dene Zwene es nöis Bier use – u när – fasch wi uf Kommando würkt das – luege si aui zum autä Fritz – aber dä het äuä gar nüt mitübercho – dä starrt immerno uf si Blick – u e Tropf Nasäwasser löst sich vo sim Nasäloch – u fliesst über si Schnouz – u vo dert i sis Café Creme.
Es wird ne klar – dass sie gar nid wüsse – öb der Fritz gimpft isch – dass sie eigetlech vo viune nid wüsse – öb sie gimpft si – u dass die iz aui wärde stärbe – Dasch scho chli brutau – seit der Ruedi – Aber es isch äbä o grächt – seit der Tschämmeri – wüu sie üs wei ungerdrücke – chnächte wei sie üs – U iz luegt der Fritz churz härä – u när wieder i sini Zitig.
U viu später – wo die aui scho wäg si – u dr Tschämmeri dr Hirsche abbschliesst – u näb sire Harley steit – u vis à vis gseht er – vom Liecht beschune – dr Bäre – dr Bäre Hasle – Das isch no e Pacht – dänkt der Tschämmeri – u när chunnt ihm i Sinn – dass der Pächter vom Bäre – dass dä doch gimpft isch – u der Tschämmeri kicheret lut u glücklech id Nacht.
U glichzitig chunnt der Ruedi dähei ah – uf sim Hof im Bschüttu – u gseht witer äne dr Hof vom Bachmä – dä arrogant Siech – mit sim nöie Tenn mit auem Schniggschnagg – u när chunnt äbä o am Ruedi i Sinn – Dä Bachmä – dä isch doch gimpft – U vom Bier beflüglet – nimmt er ds Mässband – u leit sini Stirnlampä a – u geit übere – zum scho mau chli Mäss näh.