Der Ruedi wohnt im Bschüttu – dasch ider Nöchi vo Huttu – u vo Burdlef – dert wohnt si Töfflimech
Dasch dr Pesche – dä het Ahnig vo Technik – u o vo Politik
Dä seit Chemie bruchts nur ir Botanik – aber sicher nid i mim Arm – lueg mi ah – seit der Pesche – fit u gsung u das mit füfzgi
Tatsächlech würdme ihm ds Füfi nid ggäh – aber dasch o chli wäg de vile Tattoos – u der Sunnebrülle
Das macht scho e Ungerschied zure Läsebrülle – wie die ihr Stadt – die gseh aut us mit ihrne Läsebrüllene – u die lö sich äbä o la impfe – wüu me dert schneuer auteret – wäg ohni früschi Luft – u wäg ohni die guete Kollege
Hie ufem Land herrscht no dr Freedom – chasch d Musig lut ufdräiä – bis am vieri hingerem Schopf Bier suufe – dr Grill i Bach schiesse – chli bsoffe Usländer beschimpfe
Wäg dene Arschlöcher laht me sich doch nid la impfe – Hie hei scho immer aui gseit – dass Usländer Unglück bringe – u we d Chinese nid chöi d Häng wäsche – de isch das ihres Problem
Dr Ruedi wischt sini Chlampfä ömu immer nachem Chrampfä – wär ja süsch o gruusig – u när tuet er sogar no chli Crème druf
Die het er vor Regä – die kennt sich us mit Chrü-ter – u die Crème – seit d Regä – die hiuft gäg offni Häng vom Büetze – u gäg entzündeti Huef – u wundi Nasä vom Schnütze – u wed die ar Hang hesch – chasch äbä o Häng schüttle – ohni dass d das Corona überchunnsch
Eigetlech sötti d Regä – vo da här – ize riich si – aber das isch si nid – schaffet geng no bir Spitex z Trachsuwaud – während da die Türke z Dütschland – wo da dä genmanipuliert Impfstoff gmacht hei – die sige iz Milliardäre – wo blibt da d Grächtigkeit – fragt sich der Ruedi – d Regä isch e Gueti – isch e Gschidi – u gseht huere guet us – u versteit würklech öppis vo ihrem Bruef
Ihre hätt ers gönnt – aber dene Usländerdökter im Dütsche sicher nid – die stecke viumeh unger eire Deckä – mit dene z Bärn unge – das seit ömu der Pesche – u dä versteit öppis vo Politik
Kenneglehrt hei si sech im Hirsche z Hasle – dert isch der Tierarzt – dr Dr. Bumä – e studierte Maa u dä seit oh – weme ere Chue nachem chaubere ke Antibiotika git – de quält me das Tier – klar chame warte bis dass z Tier Schmärze hätti – hätti tääti würdi – da isches doch besser me luegt dass es gar nid so wit chunnt
Das het er ömu när äbä im Hirsche – am Pesche verzeut – u dä het gnickt u gseit – dasch echli so – wie wed ds Töffli regumässig i Service bringsch – u beidi hei sich rächt gschid dünkt – u hei churz dänkt – wieso hocke eigetlech nid mir zwe z Bärn unge – u hei nomau e Stange bsteut
Ds Läbä hie isch ömu eifach es angers – aus bi dene ir Stadt – die hocke ja aui ufenang ume – u mache auerhand perversi Sachä – grusig isch das – u när rede si gschid – u dänkä das beeidrucki settigi wie der Pesche u der Ruedi
Aber da hei sie sech gschnitte – öppe so wie am Ruedi si nöi Mäidröscher – dä het er sich iz mau gleischtet – wüu aus Buur – u ufem Land – da muess me sich aube öppis leiste – u sigs o nur der Freedom
U darum isch der Ruedi so guet im Schmipfe – u darum lö är u der Pesche sich nid la impfe – aber Chemie für Vieh u Fäud – das isch wichtig – das isch der Fortschritt – u so lang die ir Stadt gärn es saftigs Entercott us der Region hei – söuä si d Schnurrä häbä.