i mim muul e ferschteinerig fonere zunge. e töibi. es nüüt. nach jedem abtauche ufte rükbank. zunge. rache. lippe. iitröchnet. ferschteineret. e mumie useme drütuusigjöörige schlaf fewacht. alles nur immer no mee. widas in abseebarer zit ände söll ischmer es räzel.
ghöre nur immer das ewig gliiche rolle. blinke. faare. näbemir alles am schlafe. am schtüür fore sizt de röne. dusse gaat langsam de tag zänd. zungebewegig bricht di oberschti schicht. füechtikeit bricht dure. naches paar minute wachzueschtand chani dur tnase schnufe. schmöke min atem dur tnase. ferweesendi tiär. fuuls wasser. en komposchkübel. en schimmlige chäller. generell eher öppis wo scho lang nümenuufgmacht wordenisch.
ide apgschtandne lufpfom auto schmöki e note schimmligi zitrusfrücht. under irgendemene siz ferfuuled es paar gueti forsäz. ich lueg zum schprung ide frontschibe. mache mis schpili. di ganz wält i minere gwallt. uf schwiizertütsch chaschtin mundgruch mit eim wort gliichzitig mitte nase undem muul schmöke. filicht ischtas e würklich waari tütschwiizer eigeheit. sragglett di kulinarischi manifeschtazion fo schmöke und schmöke. ich frögmi wäni sletschmal inen saftigenöpfel bisse han.
a mim bei gschpüüri de maja ires buech. si sizt zwüsche piär ummir ufem rükbank. schlaft. mittirem ferschteinerete xicht und irem schal unte gfaltete händ im schooss xeezi mängisch us wine skulptur im fölkerkundemuseum. ch mummele mi iminere jaggenii. e warmi hööli ganz für mich. ch gschpüre wis auto rollt. mini zunge kuikfideel am füechte gaume.
de röne faart ruig dur dichte fercheer ufte autobaan. i beid richtige flüüsst en schtetige schtroom fo liächter. wiiss und root. de remo seit öppis zum röne. umfeschtäntlich. pmaja hätt taugenoff. em piär sin wekker lüütet ufem händi. ich schtell mi schlafend.
*
mir kurfed durt inneschtatt. fiirabigfercheer. breiti schtraasse. fiär bis foifschtökigi hüserziile. lüchtreklame a halbzerfallne huusfassadene. parkpläz hinder gitterzüün. iichaufszentrum. starbucks. kartonschachtle. apfallaahüüffige ide huusiigäng. mänschemasse ufte trottuar undade chrüüzige. xänkti chöpf. zombis. jede zääti fuessgänger en obdachlose. en zottlige wiise hund schnüfflet im rinnschtei. en einbeinige i lümpeniigwiklet. de röne ferlangsamt. schtüürt an schtraasserand. haltet a.
türe gönd uuf. de röne ziät thampräms. ziät de schlüssel. schtiigt uus. ich binelei im auto. schpiänzle under de augelider ufs trottuar. de remo unte piär laufet ufte iigang fom klup zue. de röne fotografierpfassaade fom geboide. pmaja machte kofferruum uf. ghörsi öppis säge. si nimmt öppis use. schlezt. xeesi mizwei gitarreköffer ide hand ufte iigang zuelaufe. ich leggmi ap uft rükbank. em piär sini jagge zumene chüssi under min chopf. ich mach tauge zue. ligge ruig.
wasi jezt chönt weisi.
ich chönt jez mini augenuufmache und uufsize. chönt näbe mim rächte oberschänkel ufte roti kunschtoffchnopf truke. chönti di silbrig lasche fom gurt xee ufblize unte gurt langsam fom zug fom uufrollmechanismus über mi ine la ziä biser linx fo minere schultere zum halte chämt. chönti dänn mini linggi hand an türgriff fode lingge hindertür füere und tür uufmache. chönti dänn luege öps ufte rükbank undim fuessbereich gradno apfall hetti zummittnee. chönti pomtschipspakig unti paar läre plastigfläschli mitte rächte hand uufläse unnacher mis lingge bei usem auto uselupfe. chönti de herti bode fom asfaltierte trottuar under de tike sole fo mim schwere schue gschpüre. chönti mis rächte bei scho nachezoge und geischtesgägewärtig min chopf iizoge ha und im nächschte momänt halbwäx uufrächt ufem trottuar schtaa. chömpmi dussenuufrichte unkurz luege wode nechschti apfallchübel isch. chönti zum maschte fode nechschte schtraassechrüzig tschalpe unte apfall idi überfüllti blächtonne schtopfe. chönti smünz usmim hosesak grüble unzem penner am huusegge in kafibächer schmeisse. chöntem ufmunternd zuelächle. chönzini ferfuulti oberi zaareie xee. di underi winen ferwitterete holzzuun mikrüüz unkuer schtehende pfööl und schtümpf. sini dräkige händ. sini schwarze fingernegel. chönzini süürliche uusdünschtige schmöke. chömpmer tänke dases fölig naafollziäbar isch daser trozem klimperenim kafibächer nüütegliche tuet.
chömpfilicht merke dass hinder mir eis fode plastigfläschli wider usem chübel use gschpikt und an bode gheyt isch. chönz no xee in rinnschtei höpperle und zwüsche schtraasseschtaub umpüschel fo hundehaar in ruezueschtand zittere. ich chönti twassertröpfli ade innewand fom fläschli xee. chöntis uufnä unznomal probiere in chübel zschtopfe. chömpmi umtreye und luege wo mer da aacho sind. chömpmer dänn überlegge öbimer e zigi aazünde. chönt dänn finde dass i ee scho sone trochni frässi han untrum druf ferzichte. chönti dänn ufte iigang zuelaufe umpfassade fom huus beoige. chömpmer plakaat aaluege fo konzert wo bald schtapfinded oder for churzem xi sind. chönt nachem plakaat fo hüt abig sueche. chömpmer de bode aaluege. de asfalt. träkschtriäme. trize. pfurche. tschtaubwehe. papiirli. kaugummi. zigischtummel. chönti zude grosse buechschtabe überem iigang ufeluege unte name fom klup läse. chönti an himmel luege ummerke dases zwar no heller isch asi gmeint han aber dass zune jeztänn grad undergaat. chönt im schatte fode schtatthüser ufem trottuar schtaa unti flach iifallende suneschtrale xee wo es paar hüserziile wiiter fassadene zum lüchte und fänschter zum blize bringed. chönt churz an blaue himel luege und rosaani wulchefäze und schtriäme und furche und rize xee umpfinde dass sich himmel untrottuar wi negatiif schpiäglet. chönti dänn zude iigangstür ga undes paar uuflokkerndi wippschritt mache. wel pflügeltür nöd apgschlosse wär wür de einti fode gschlossne flügel chli füreschtaa unzo wüssti grad a welem fode beide türgriff ich müsti ziä. dur de schpalt würi ines fuaiee fomene alte teater inexee. chönti dänn en schritt iä mache umpfeschtschtele daste bode mit grüenem schpannteppich uuskleidet isch. chönti di lange jaar fodem abegnudlete klup am fersiffte teppich feschtmache. de schtraassedräk fo abertusige schue. feschüttez biär. zigiäsche. haar. huu-partikel. sagmäl fode schriiner wo for foif jaar e noii tür inschtalliert händ. schtaub unträk fo mindeschtens foif kontinänt wo musiker a irne schue fo irne heimatschtett und schtraassechrüzige über flugzüüg umpflughäfe und bändbüss ummotels untusigenandere klups und schtett ummiätautos untaxis unkünschtlerateliees undafterpartis untschliässlichüber di paar meeter übers trottuar bis da ine treit händ. genau widi musiker chönt au ich dänn wiiterlaufe untuur de linggi oder rächti durchgang fom foiee in grosse saal cho wopüüni isch. chönti ufem wäg durs fuaiee di apgschtandni luft iischnuufe ummi erinnerepfüüle a rüüm wokän andere zwäk händ as das anes paar öbig pro wuche es paar hundert konzertgänger dursi durelaufed oder chli ferlore drin umeschtönd ummitteme biär ide hand fesueched halbwäx kul uuszxee und irgendwo dezue zghöre.
di apgschtandni luft fo rüüm wode taag uus for sich hi schtinked wel niämer tür uufmacht. rüüm wo am abig unagnäm chalt sind weldänn türe entweder ganz offeschtönd oder all paar sekunde uufgmacht werded wel schtändig irgendöpper meint er müsi umbedingt ine oder useschtürchle. rüüm wo dänn for und nachem konzert fo ewig hirnlose alltagsgschpröch gfüllzind. fomene kontinuierlichem gebrabbel fo halbweisheite und alltaaxteorie wo nur underbroche wird dur zwanghafz iischütte fo biär useme plastigbächer wot ade bar gägenes depo zämemitteme jeton uusghändigt überchunsch. es fuaiee foll fo schtändigem glukse und japse und kuäke und röchle und brabble und daaschtaa und raschle und plääre und schnure und im beschte fall echli chääre wärentüür kaufz biär über di wiissgääl beleiti zunge unti eigene schue unte siffigi teppich gschüttepwird umpfo aller wält umbemerkt zigiäsche und schpoiz umpöögge und haar und huutschuppe dur de ruum und ufte bode sägled. und ersch wänn gnueg dräk ap und wider uufgladenisch troupme sich usem klup use. usenuft schtraass. ikelti. itnacht. itautos. ituubaan. ufte bus. ufte heiwäg. zrugg idi schimmlige chline wonige. idi füechkalte hüüser. idi fermilbte better womer iigmummelet i sini siidigi bepwösch sich sis schiissige rüüschli uusschlaft beforstänn am nechschte morge wider as uufschtaa gaat ummersich i sinerenänge tuschkabine mitteme fechalchte tuschchopf ide hand mit ztüüfem waasserdruk de dräk fom abig forher fesuecht abzwäsche. sich irgendes medizinisch schtinkenz halbääzenz tuschmittel ischmiert welme dra glaupt dass suberkeit wine arzpraxis schmökt. wime us halber fogelperschpektiife asim umförmige körper abeluegt unzini füess im apgschtandne wasser ide tuschwanne xeet ummerkt dasme widermal zechenegel schniide müsst. wime chli asich umeschpillt untänn aber doch scho to do-lischte für de tag duregaat unzfingerle dänn doch sii laat wels irgendwiä doch nözo richtig wott wärenz wasser uste brause äntlich richtig warm und heiss wird ummer garniänez andersch ane möchti als für immer idere dampfwälpfodere filzänge tuschkabine ewige fride zfinde wärente dräk mit no mee schuppeflächte und tike schamhaar und tunkelgäälem morgebisi undem schpoiz uste fertröchnete frässi im schtrudel überem langsam prozessierende tuschapfluss chreist. wime s wasser aptreyt unti florierende pilzkultuure a sine füess mitte iigwachsene negel ade deformierte unkronisch fechrampfte zeche usem schtehende dräkwasser fode tuschwanne lupft unzi ufti sit jaare scho immer chli füechtranzigi plüschfuessmatte sezt.
wimer im füechte wasserdampf fo sim winzige schimmlige bazimmer mipfil zchlinem fänschter und fermuetlich defekter lüftig zmizt isim läbe schtaat und en schluk chloorwasser fom wasserhaan nimmt undeim in sinn chunt dasme fegässe hät milch zchaufe untrum besser und erschno gratis im büro sin erschte kafi nimmt. wimer sich sini tablettli is muul schtopft umfro isch dases si git. wimer a sin arzt tänkt wo scho bim frage nachem befinde aafaat eim s zedeli schribe beforer wider uf sin biltschirm luegt unzum abschiid chuum no sini hand zumene winke hept. wimer sich bim uselaufenuste praxis über dä uuspränti arsch i xundheizturnschue und wiissem chittel ärgeret aber scho bim abelaufenim schtägehuus nurno ad apoteek unti chline pelzige bömbeli undan taube fride woseim bringed tänkt. wimer alles abeschlukt unz bazimmerfänschter uufmacht umpeschter dinge inen wiitere ganz normale tag fo sim hunzerbärmliche läbe schtartet.
wasi jez chönt weisi.
ich sizenuuf. ziän am griff fode autotür untruksi en schpalt wiit uuf. tluft isch chüeler as erwartet. es schmökt nach abgas umpfrittööse.