ziitewiis nur s brumme fom motor. schlukpfasch alles mängisch. gangschaltig. beschloinigung. uusrolle. macht alles grüüsch. ruuschet. zwüscheture tikkt de blinker. luut passiärendi laschtwäge. meermals pro minute.
es lauft musig im auto. apschtrakt. deet chlopft eine ufe schachtle. ufe guezlibüchse. ufes schtük holz. schüttlet dezue glöggli. murmlet es mantra. minuutelang. immer s gliich. unklar was schtraassegrüüsch. unklar was musig. unklar was liäd. und was nöd.
rächz näbe mir liit de piär. ferchrüglet im egge. zwüsche tür und rükbank. de schal über de auge. s muul offe. iitröchnete schpoiz im muulegge. schtopplige drütagebart. schnuuft durs muul. xees mee asis ghör.
mini bei i beesche liinehose. linx en riss am chnü. drunder schwarz. mini langenunderhose. dusse grau. felshäng. wälder. halbhöchi bergschpize. es hochplattoo. schtroommaschte. en see. wise. weid. chüe. zu hunderte. tuusige. am gras frässe. umeschtaa.
holzzuun. sumpf. nomal en see. e böschig. böschige. fom rüksiz uus xeepme for allem böschige.
forois schwarzi schtraass. hinderois schwarzi schtraass. horizontali heizdröötli im fänschterglas fode rükschiibe. wertikal flüchted gäli schtreife. laufed in horizont use. bis zude nächschte küschte. bis zum nächschte meer. oder bis zum nächschte auto. zum nächschte chare. zum nächschte pick-up. zum nächschte überlange schwertransport.
baumschtammladig um baumschtammladig. ganzi ex-wälder uf wanderschaft. abschniide isch scho immer eifacher xi. zwüscheturenau laschtwäge oni aahänger. nur kokpit. faargschtell. räder. fokuhila. xänd uus wi abxaget. wi aptrännti gliidmasse. wi ferschtümmletti rägewurmändene. rased a ois ferbi wi dureprännti ross. haltez fasch nöd uus oni wald im schlepptau.
am schtraasserand gäli warnschilder. grüeni orzschilder. alles hinder dräkigem fänschterglas. fereinzelti wassertropfe. genau ide mitti fode windschuzschiibe de grossi schprung. ide form fomene bassschlüssel aber schpiägelfecheert. linx und rächz fom schprung sized de remo umpmaja. er am faare. si am läse. genau überem schprung de rükschpiägel. drin gschpiäglet mini augepartii. schättenunderde auge. schwarz.
mini schwere füess i mine schwere schue. bizli chalt ade schpize. mini chalte händ iiklämmt zwüsche sizpolschter und oberschänkel. es chüzlenim hals. trochni naseschliimhüt. linx mini ferchrampfti schultere. ufem sizpolschter mis plattxässne füdli. drukschtelle a mine sizhöker. es schtändix chrüselenide bei woni nöd weggbringe. nöd eso. nöd im size. scho siit tage es schtäche tüüf im hals. tüüf. fascht scho zwerchfäll. ich richtemi ufem siz uuf.
mir faared apte autobaan. tankschtell. laschtwäge. werbeschilder. fom plözliche manöfriäre wirpme schlächt. mer rolled ade tankschtell ferbi. pmaja schtellpmusig ap. hinderde tankschtell en riisige parkplaz. rund ume en eischtökigi hüserziile in form fomene huufiise. schops. e fersicherig. en arzt. chleider. schue. kompiuuter. ässe. börgers. asiatisch. zmorge. kafi. mir faared über di leere parkpläz. mir haltepforeme zmorgereschterand. liächtreklame. all you can eat. halbi zäni am morge. mage nüm.
dussenischs weder chalt no warm. chli füecht. niämer zünzich e zigi a. mi gönd übere zum reschti. möchti gern chli luschtixii. öppis luschtix mache. laufenufte kante fom randschtei. mach paar gümp. schtrekemini ärm itluft. probiärenuustrukstanz. mach de hampelmaa. cross-fit. aerobic. art on ice. wot di andere zum lache bringe. niämer reagiärt. niämer luegt. pewegig tupmer trozdem guet. lööst echli. s chrüselenide bei scho fasch ferklunge.
me sized dinenap. plastifiziärti menücharte. fotografiärz ässe. farbschpektrum gäl root bruun. bizli grüen. how are you guys today? e frau schtaat am tisch. wiissi schürze. zwei kafichanne mit schwarzem kafisaft ide hand. decaf? remo machtes affix xicht. presst tlippenufenand. mich fetätschz. remo. grimassekönig. alli schüttlete chopf. pfrau füllt oisi wisse tasse mipächschwarzer flüssikeit. dampfschwädeli züngled wi ide werbig. mir pschteled zmorge.
*
ufem weezee bini für miich. s lauft musig. every 1’s a winner baby. tür gaad uf. s chunteinenine. klik klak. tönt nach holzapsäz. isch niämer fo ois. mi händ gummisole. ich ghörene gürtelschnalle. dänn schtilli. sekundelang. luft aahalte. dänn en furz. dänn bislez en churze schwall. dänn gütschli für gütschli.
ide pause gflüschteret lord. dänn irgendwänn jeez! am schluss käs würklichs ändi. mee en entscheid. hörbar nassi finger. wider gürtelschnalle. holzapsäz uf fliisebode. sauhund wäscht thänd sicher nöd. tür gaad uf. reschterandgrüüsch. tür schliift is schloss. xeesch?
bim händwäsche xeenimi im schpiägel. augepartii müed. schätte. mache grimasse. aasazwiis es sälpschgschprööch. hirnloses fo geschter. yeah switzerland. chocolate and cheese. you know. banks. cows. federer. exactly. yeah. gott im himel.
gange zrugg is reschti. zrugg an tisch. hot chocolate im oor. bergewiis ässenufem tisch. di dampfende tasse. ich ha kooldampf.
ch sizenam schtüür. tempomaat. remo ummaja hoked ez hine. er am gäime. si am läse. de piär näbmir laat musig la laufe. fezelt gschichte fom underwäx si. fo paris. fo fründe. fo sinere blaasmusig. fom bogeschüüsse. cha guepfezele de piär. losem gern zue. bogeschüüsse mus würkli geil si. blaasmusig au. ich glaubems langsam.
chanaber nöd los laa. bin aagschpannt. wi immer am schtüür. farenöggern. fülmi nözicher. scho garnöd mit tempomaat. füülmi oni bode. oni halt. oni grund.
überlandschtraas. eischpuurige gägefecheer. wiipforois en schliicher. blaue pick-up. xeenen scho. winer schliicht. wirden wool oder übel müsenüberhole. scho bald.
chume nöcher. wiipfoore chunt einenentgäge. gaad aber no lang. piär repfo blaasmusig. fode klangchraft. fode klangsüüle. wiseim mitriist. wimer drin uufgaat. wimer eis wird mittenandere. wimer ei chraft wird.
ich blinke. wächsle tschpuur. gibe gas. gschpüüre fasch kä pfupf. hami scho xee am blaue ferbiiziä. chumenaber nöpwükli fom fläk. luege füre. xee de ander entgäge cho. drükes gaaspedal dure. s passiärt nöpfill. piär seit nüüpme.
gliichuuf mittem blaue. xee de faarer am schtüür. schtiärenakke. wiissi schträne umt oore. es rooz tschäpi. luegt graadus. laami ferbi du arsch. ch ha s gfüül er beschloinigi au. ch luege füre. de ander chunt nöcher. s wird langsam knapp.
ghörenes schnälls chlopfe. tägtägtägtägtägtäg. jez gschpüüris au. ch faarenufte linggenussemarkiärig fode gägefaarbaan. ch feschrik. ch ha kä bode. ch riisse s schtüürraad ume. fil zabrupt. ramme fasch de blau. alles schlingeret.
de ander wo entgäge chunt bländet uuf. s bländepmi. panik. ch brämse. rukartig. s ganze auto zukt. stolperepforwärz. schtemme mi mit ärm umpei gäge de schuub. de piär sini beide händ ufem häntschefach.
de blau ziätefo. ich ziä nach rächz uf oisi schpuur. s auto ufte gägefaarbaan ruuschepfebi. es langzognix huupe ziäpfebi. feschwindet.
ch luege tschaaf a. wiis bis grau. bruun ferschlammti bei umpüüch. glozepmi a. mängisch ghörisi schreye. ghöreniri glöggli. ziäne ade zigi. tüüf bis itlungenabe.
size mitaazogne bei am schtraasserand. de rugge zude schtraass. schtriiche mitte hand über de uuslaufendi rand fom asfalt. einzelni graashälm. schteibrökli. erde. pfüess ufem weiche bode fom apfallende bort.
es schaaf schtrekzin chopf dure masche im draat. zwüscheture faartes auto ferbi. laschtwäge mipaumschtämm. every 1’s a winner baby. that’s the truth. merk plözli dass forenam gitter es anders chlises schöfli sizt wosich nöpfom fläk bewegt.
riisse mini händ itluft. alli schaaf schpringepfom gitter weg. s chline schöfli bliipzize. es fesuecht nöpmal uufzschtaa. dukzich halpazig wegg. kneift tauge liächt zue. wine chaz wämmer si aaluegt. ich xee trosa wunde a sim bei. offe. fleisch. s schöfli luegpmi a.
ch ghör d tüüre fo oisem auto schleze. eis. zwei. drü. ich schtanenuuf. gangenübere.
*
wenigschtens musi nüm faare. rükbank machpmer nüt us. s chrüselenide bei nimi in chauf. wäni de chopf chli schräg hebe. passiärt öppis luschtix. de riss ide frontschiibe teilt tschtraass for ois enzwei. ferschiäpt di einti helfti nach obe. di anderi nach une.
de apschtand wird grösser oder chliner wäni de chopf chli hebe oder sänke. tektoonischi feschiäbig fo zwei erdplatte. wi bimene erpäbe. di farbige autos ganz de ferschiäbig uusgliferet. di ganz wält i minere gwallt.
erinnerepmi a bilder usem reader’s digest. isch dihei immer umegläge. hani gern gläse. pilder aagluegt. kataschtroofe. terror. drama. wildnis. amerika.
ufte rükbank läse chani nöd. schlafe nach churzer ziit immer ii. und gäime. ja cha scho gäime. aber isch so bireweich. unte tuume tupme wee nacheme wiili. film glozze. ja chani scho. aber isch tooti ziit. foralem wän niämer ret. wämmer niämer zum rede hät. isch tooti ziit wämmer niämer zum rede hät.
ch ha s gfüül ich gang allne nur uft nerfe. wäni frage schtele sowiso. aber fo siich uus seit niä öpper öppis. usser de piär. aber piär isch am schlafe näbemiär. uste boxe wider das chlöpfle. rassle. schtampfe. zwüschem piär ummiär ufte rükbank liiz buech fode maja. darm mit charme.